Knut Olstad starta å leige hytta i 1990 og kjøpte staden i 1993. Det stod dårleg til; hovudhytta var golv- og taklaus, det var ingen stad for lagring av ved, propan og varer, og det var ikkje moglegheit til å overnatte på nokolunde vis. Utedoen var òg ei stusseleg affære, så det var mykje som laut takast hand om. Saman med foreldra bygde Knut opp staden steg for steg. Fleire andre har òg bidrege med innsats, både med tanke på utforming så vel som mange tunge lyft av stein.

Sidan Knut Olstad overtok i Peer Gynt har han dei siste 30 åra lagt ned ein stor innsats og gjennomført eit omfattande kulturarbeid med tanke på å ivareta og halde levande ein viktig del av vår fjellhistorie.

Restaurerings -og vedlikehaldsarbeidet har vore mogleg gjennom ein enorm arbeidsinnsats og bruk av eigne middel. Dette arbeidet har vore gjennomført samtidig med drift av hytta. Peer Gynt-hytta er ei perle i Rondane nasjonalpark. For både turistar og bygdafolket er ho eit viktig turmål og ein attraksjon i kommunen. Og saman med dei andre flotte bygningane går hytta fint inn i landskapet.   

For sitt store engasjement og omfattande arbeid i Peer Gynt er Knut Olstad ein verdig mottakar av Sel kommunes kulturpris for 2023.